Кабатланмас моң кичәсе

2019 елның 20 февралендә Татарстан Республикасы Милли китапханәсенең Зур уку залында (Казан шәһәре, Кремль урамы, 33 йорт) Татарстанның халык артисты, җырчы Георгий Ибушевның «Күңелемдә яз» дип аталган иҗат кичәсе узды.

Кичәне китапханәнең күргәзмәләр һәм мәдәни программалар бүлеге мөдире Гөлназ Габдрахманова Георгий Ибушевның «Җыр» шигыре белән башлап җибәрде.

Георгий Ибушев исә үзенең балачагын, яшьлек елларын җылы хисләр белән искә алды, кызыклы истәлекләре белән уртаклашты. Искиткеч мәгънәле шигырьләрен укыды.

Һәм, әлбәттә, җырлар..., халыкка танылган җырлар... Бу кабатланмас, үзенчәлекле тембрлы тавыш, моң күңел кылларын тибрәтте, яшьлеккә алып кайтты. Тамашачы татар халык көйләрен тере тавышка тыңлап ләззәтләнде. Һәр җыр көчле алкышлар белән бүләкләнде.

Кичәдә шулай ук сәнгатькярнең иҗатташ дуслары, якташлары, замандашлары, якыннары катнашты. Нәфис сүз остасы Рәшит Сабиров Георгий Ибушевның шигырьләрен яңгыратты. Җырчының шагыйрь буларак иҗатына югары бәя бирде: «Ул – эчкерсез. Сәхнәдә дә, тормышта да», – дип сыйфатлады. Танылган җырчы, Татарстанның халык артисты Фәрит Мирзануров Георгий Ибушев сүзләренә язылган җыр башкарды.

Җырчыга булган югары дәрәҗәдәге оста аккомпонементны популяр музыкант, Татарстаның атказанган мәдәният хезмәткәре баянчы Геннадий Максимов һәм пианист, Татарстанның атказанган артисты Роман Чуйнов башкардылар.

Кичәнең иң зур кунагы, әлбәттә, Татарстанның халык артисты, профессор Мингол Галиев булды. Георгий Ибушевның якташы, иҗатташ дусты җырчының моңга, туган телгә тугрылыгын ассызыклады. Ә инде ике бөек моң иясенең «Китмә, сандугач» җырын башкаруы кичәнең иң югары эмоциональ ноктасы булды.

Әлеге очрашу җылы хисләр уятты, күңелләрне җилкендерде. Һәркем үзенә рухи чистарыну, якты тәэсирләр алды.

Георгий Ибушев кичә азагында: «Бүген бетмәс-төкәнмәс көч алдым», – дип, яраткан тамашачысына, кичәне оештыручы китапханә хезмәткәрләренә олы рәхмәтен белдерде.