Татарстан Милли китапханәсенә – 155 ел

10 гыйнвар 2020 ел., җомга

Татарстан Милли китапханәсе Россиядәге һәркем файдалана ала торган җәмәгать китапханәләренең иң әвәлгеләреннән санала. Аның чишмә башы Казан шәһәрендә 1865 нче елның 10 (24) гыйнварында ачылган Казан җәмәгать китапханәсенә барып тоташа. Милли китапханәнең кулъязмалар һәм сирәк китаплар бүлегенең уку залында шушы әһәмиятле вакыйгага багышланган «Без тарихта эзлебез...» = «Вехи истории» дигән китап күргәзмәсе куелды (Казан, Карл Маркс урамы, 36).

Күргәзмәнең беренче бүлеге – Милли китапханәнең 155 еллык тарихына багышланган. Анда китапханәнең ачылу мизгелләрен, беренче отчетларын, аның үсеш юлларын архив документлары аша күрергә була.

Күргәзмәнең икенче бүлеге – Казан җәмәгать китапханәсенә нигез салган, китап сөюче (библиофил) Иван Алексеевич Второв (1772-1844) һәм аның улы Николай Второвларның (әдәбият белгече, археолог һәм этнограф) казанлыларга бүләк иткән шәхси китапханәсе турында сөйли. Бүгенге көндә бу уникаль китап ядкарьләре 1717 томда сакланып, китапханәнең горурлыгы булып тора.

Күргәзмәнең соңгы бүлеген «Милли китап» нәшриятында дөнья күргән басмалар тәшкил итә. Укучы монда күренекле шәхесләр тормышы һәм иҗаты турында да, китапханәдә саклана торган төрле шәхси китап коллекцияләренең каталоглары, китапханә эшенә караган күпкырлы методик ярдәмлекләр белән дә таныша ала. Болар барысы да Милли китапханә хезмәткәрләренең иҗат җимешләре.

Хөрмәтле укучылар, китапханә сезне көтеп кала. Күргәзмә 2020 елның апреленә кадәр эшләячәк.

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Яндекс цитирования