Безнең бәйрәм (Мирһади Разов)

Сабантуйлар җитте, Сабантуйлар!
Туган җирем нурга күмелде.
Сабан туе - шатлык туе бит ул,
Милләтемнең ачык күңеле.

Көч-гайрәт тә, уңган-булганлык та
Сабантуйда гына сынала.
Бәйрәм рухы биләп ала җанны,
Кайгы-хәсрәт китә, югала...

...Мәйданнарда биек колгаларда
Ак сөлгеләр - ап-ак өметләр.
Бил алыша батыр калу өчен
Әзмәвердәй безнең егетләр...

Су ташыйлар, чүлмәк вата кызлар,
Бәйге бара мәйдан түрендә.
Сабантуйда алган яшәү дәрте –
Ел буена сүнмә, сүрелмә.

Сабантуйлар гөрли, Сабантуйлар!
Колач җәя татар бәйрәме!
Безнең көчтән, уен, җыр-биюдән
Тетрәп торсын дөнья мәйданы!
Сайттагы барлык материаллар лицензия буенча тәкъдим ителә:
Creative Commons Attribution 4.0 International