Сабантуй (Факил Сафин)

Сабантуйда
Кызык анда:
Кеп-кечкенә малайлар,
Сөлге салып билләргә,
(Биттән ага тирләр дә),
Көрәшеп маташалар,
Пыр тузып атышалар.
Авып китәләр уңга,
Авып китәләр сулга.
Сөлгегә уралалар,
Гөрс килеп авалар.
Сикерешеп торалар,
Сөлгегә тотыналар.
Бу инде уен түгел,
Сыек бил, муен түгел –
Чын көрәшче малайлар,
Шаккаталар агайлар:
Кеп-кечкенә малай булып
Мәйданга керделәр дә,
Татар егетләре булып,
Чыгып киләләр менә.
Сайттагы барлык материаллар лицензия буенча тәкъдим ителә:
Creative Commons Attribution 4.0 International