«Китапханәләр эшчәнлегенең норматив-хокукый базасы: мәгълүмат чыганаклары үсештә» семинары

14 нче февральдә Татарстан Республикасы Милли китапханәсенең мәгълүмат-библиография бүлеге базасында «Китапханәләр эшчәнлегенең норматив-хокукый базасы: мәгълүмат чыганаклары үсештә» исемле семинар узды. Идарә итү эшчәнлеге белән шөгыльләнүче үзәкләштерелгән китапханәләр системасы хезмәткәрләре өчен идарә итү эшчәнлегенә караган һәм норматив- хокукый документларның басма мәгълүмати чыганакларыннан, китапханә белән идарә итүгә багышланган китаплар һәм журналлардан күргәзмә оештырылды. Интернет ресурсларга күзәтү ясалды.
Күзәтүнең темалары:

• Норматив-хокукый документларның сайтлары һәм порталлары;
• Китапханәнең идарә эшчәнлеген документлаштыру;
• Үзәкләштерелгән китапханәләр системасы филиалы шартларында документ әйләнеше. Электрон документ әйләнеше;
• Китапханә эшчәнлегендә стандартлар;
• Китапханәләр эшчәнлеге сыйфаты мониторингы һәм сыйфатны билгеләү;
• Дәүләт заказы. Хәзерге заман китапханәсе белән идарә итү.

Тыңлаучылар өчен китапханәдә булган мәгълүматлар базалары: «Россия вакытлы матбугаты», «Китапханә эше һәм мәгълүмат эшчәнлеге» (ООО ИВИС) һәм «Россия стандартлары күрсәткече» тәкъдим ителде. «Консультант Плюс» һәм «Гарант» тулы текстлы мәгълүматлар базаларыннан мәгълүмат эзләү мөмкинлегенә күзәтү ясалды.