Спорт калейдоскобы

Тагын берничә көннән Казанда башланачак Универсиада уңаеннан Татарстан Республикасы Милли китапханәсенең күргәзмәләр һәм мәдәни программалар бүлегендә (Казан, Кремль ур., 33 нче йорт) «Спорт калейдоскобы» дип исемләнгән китап күргәзмәсе ачылды.
Үзенең кунакчыллыгы белән дан тоткан шәһәребездә 2013 нче елгы Бөтендөнья Универсиадасы яшьлек, спорт, тынычлык, шатлык, мәдәният һәм традицияләр бәйрәме булачак.
Универсиада – Россия спортчыларының казанышларын гына тугел, ә дөньякүләм студентлар спортын яктыртучы күркәм күренеш. Казандагы Универсиаданы Татарстан өчен моңа кадәр тиңе булмаган вакыйга дип карарга мөмкин.
Күргәзмәдә сәламәт яшәү рәвешен пропагандалаучы күптөрле басмалар урын алды. Шулай ук аерым спорт төрләренә караган, аларның үсеш тарихы, спортка хәзерләнү техникасы турындагы әдәбият белән танышырга була.
Күргәзмә 2013 нче елның июль ахырына кадәр дәвам итәчәк.