Композитор Луиза Батыр-Болгариның күркәм юбилее

Иҗаты үзебезнең республикада да, аннан читтә дә киң танылган композитор Луиза Батыр-Болгарига 2013 нче елның 14 нче августында 60 яшь тула.
Татарстан Республикасы Милли китапханәсенең сәнгать бүлеге оештырган күргәзмә әлеге истәлекле датага багышлана. Күргәзмәдә композиторның ноталы басмалары һәм әсәрләренең музыкаль язмалары тәкъдим ителә.
Луиза Батыр-Болгари тарафыннан 200гә якын җыр, 20 спектакльгә көйләр, камера һәм симфоник әсәрләр иҗат ителгән.
Композитор иҗатында балалар өчен язылган музыка да зур урын алып тора – мондый җырларның, инструменталь пьесаларның, музыкаль әкиятләрнең күбесе Татар дәүләт Курчак театры сәхнәсе аша яшь тамашачыларга җиткерелде. Аларның аеруча яхшы билгелеләре: «Җырлап узган җәй», «Сихерләнгән урман», «Патша кәләше», «Җен кызы» һ.б.
Аһәңсаз ханымның музыкасы үзенең ихласлыгы, самимилеге белән күңелнең иң нечкә кылларын тибрәтә, тыңлаучыларның рухына дәрт-дәрман һәм ышаныч өсти.
Теләгән һәркемне композиторның иҗаты белән танышырга, яхшы кәеф бүләк итүче көйләре белән ләззәтләнергә чакырабыз. Рәхим итегез! Театр урамы 5 нче йортта Сезне шатланып каршы алырбыз!