Бүләккә – китап

Татарстан Республикасы Милли китапханәсе фондларына инглиз телендә нәшер ителгән «Мөхәммәд, Ислам илчесе: аның тормышы һәм пәйгамбәрлеге» исемле китап тапшырылды. Канадада 2002 елда басылып чыкккан әлеге китап – Америка Кушма Штатларының Мичиган штатында яшәүче Орхан һәм Җәнән Ток гаиләсенән бүләк. Бүләкне китапханәбезгә китерүче Марат һәм Диләрә Хафизовларга аерым рәхмәтебезне белдерәбез.

Китапның авторы – Казан шәһәрендә туган милләттәшебез хаҗия Әминә Әдил. Автор авыр чорда, репрессияләр вакытында дөньяга килә. Кечкенә Әминә дә гаиләсе белән Себергә сөрелә. Ачлык, ялангачлыкның чигенә җиткән гаилә бер төнне ерак юлга чыгып китә. Сәяхәтнең ахырында гаилә үзләренең икенче туган иленә әйләнгән Төркия дәүләтендә торып кала. Әминә бөтен гомерен Исламны өйрәнүгә багышлый. Пәйгамбәр турында материаллар туплый һәм, күп көч куйган эшенең нәтиҗәсе буларак, әлеге китап басылып чыга.
Мондый тематикага багышланган китаплар бик күп басылса да, автор фикеренчә, аның хезмәте Мөхәммәднең пәйгамбәрлек юлын һәм тормышын өйрәнүдә яңа баскыч булып тора.

Татарстан Республикасы Милли китапханәсе Орхан һәм Җәнән Ток гаиләсенә бу зур бүләк өчен бик рәхмәтле. Китапханә идарәсе шулай ук китапның тиешле дәрәҗәдә сакланышы өчен җаваплылыкны үз өстенә ала, китапханәгә килүчеләр аннан файдалансын өчен барлык шартлар тудырылачагын белдерә.