Нияз Даутовның юбилее уңаеннан

2013 нче елның 9 нчы сентябреннән башлап Татарстан Республикасы Милли китапханәсенең сәнгать бүлегендә китапханә хезмәтләреннән файдаланучыларга һәм киң җәмәгатьчелек игътибарына күренекле җырчы, режиссёр, педагог - мәгърифәтче, РСФСРның халык артисты (1957), ТАССРның Г. Тукай исемендәге Дәүләт премиясе лауреаты (1958) – Даутов Нияз Курамша улының (1913-1986) тууына 100 ел тулу уңаеннан куелган күргәзмә тәкъдим ителә.

Нияз Даутовның моңлы тавышы һәм актёрлык сәләте аңа Свердловск, Чиләбе һәм Казан шәһәрләре опера сәхнәләрендә танылу китерде. 1956 нчы елда ул М. Җәлил исемендәге Татар Дәүләт опера һәм балет театрының солисты, ә 1957 елдан баш режиссёры иде. 30 еллык режиссёрлык эшчәнлеге дәвамында аның җитәкчелегендә 80 спектакль куелган. Татар композиторларыннан Н. Җиһановның «Алтынчәч», Х. Вәлиулинның «Самат», Р. Гобәйдуллинның «Җиһангир», Б. Мөлековның «Мәхәббәт өчен җәза» опералары аның иҗатында аерым урынны биләп тора.

Күргәзмәдә укучыларга китаплар, белешмә һәм энциклопедик басмалар тәкъдим ителгән.

Без сезне Казан шәһәренең Театр урамындагы 5 нче йортта урнашкан сәнгать бүлегендә көтеп калабыз.