1 октябрь – Халыкара музыка көне

1973 нче елдан башлап бөтен дөньяда 1 нче октябрьдә Халыкара музыка көне билгеләп үтелә. Дөньякүләм әһәмиятле әлеге датага багышлап Татарстан Республикасы Милли китапханәсенең сәнгать бүлеге күргәзмә оештырды.

Гасырлар дәвамында музыка кешеләрне рухландыра, илһамландыра. Мифологик геройлар, әлмисактагы патшалар, күпчелек изге бәндәләр ритм, рифма һәм музыка ярдәмендә уйларын, фикерләрен белдерәләр. Музыканы дөнья хакимнәре дә, акыл ияләре дә, хәтта тираннар да ярата. Күренекле реформатор Мартин Лютер: «Ул иблисне куа һәм, ачуны, азгынлыкны, масаюны һәм башка бозыклыкларны оныттырып, шатлык китерә. Мин музыканы дин гыйлеменнән соң икенче урынга куям һәм аңа дан җырлыйм...» – дип яза.
Күргәзмәгә борынгы заманнардан алып хәзерге көнгә кадәр музыка тарихы, аның жанрлары, төрләре турындагы, композиторлар, башкаручыларның тормыш һәм иҗат юлын чагылдыручы бай иллюстрацияле китаплар куелган.

Сәнгать бүлегенә (Казан, Театр ур., 5 нче йорт) рәхим итегез! Без Сезнең белән очрашуга шат булачакбыз.