2300 чакрым – «ерак» җир түгел, бер күрешүләре ни тора!..

Соңгы елларда Татарстан Республикасы Милли китапханәсе белән Төмән өлкәсенең Түбән Варта шәһәрендәге 5 нче санлы китапханә арасында берничә мәртәбә видеоэлемтә урнаштырылып, ерак Себер җирендә яшәүче милләттәшләребез танылган татар әдипләре белән күрешеп сөйләшү мөмкинлегенә ия булдылар. Элегрәк Разил Вәлиев, Вакыйф Нуруллин, Мәдинә Маликова, Газинур Морат, Вакыйф Нуриев, Камил Кәримов белән үткәрелгән он-лайн очрашулар Түбән Вартадагы китапханәгә җыелган әдәбият сөючеләрдә бик җылы тәэсирләр калдырган иде.

Бу юлы очрашуга – видеокүпернең Казан ягына – Татарстанның Халык язучысы Рабит Батулла килде. Түбән Варта шәһәрендәге милләттәшләребезнең мәдәни тормышы, татар халкына хезмәт күрсәтүче китапханәнең эшчәнлеге белән кыскача танышканнан соң, әдип китап укучыларның сорауларына җавап бирде. Тарихи Ватаныбыздан бик еракта яшәсәләр дә, милләттәшләребез татар әдәбияты һәм сәнгате белән кызыксыналар, Рабит Батулланың иҗаты белән танышканнар, әсәрләрен дә (кайберләрен русчага тәрҗемәдә) укыганнар, очрашуга әзерләнеп килгәннәр. Шуңа күрәдер, бик мәгънәле һәм кызыклы сораулар бирелде. Әдип аларның барысына да тулы-төгәл җавап бирде, ара-тирә үзе туплаган гыйбрәтле мәзәкләрне сөйләп көлдереп алды, милләтебез тарихында булган аянычлы вакыйгаларны искә төшереп сагышландырды. Үзе белән алып килгән берничә китабына шунда ук имзасын куеп, Түбән Вартадагы китапханәгә бүләк итеп җибәрү өчен тәгаенләп калдырды.

Икенче көнне үк Милли китапханәнең электрон почтасына Себердән рәхмәт сүзләре тулы хат-хәбәр килеп иреште. Анда, аерым алганда, мондый юллар бар: «Тагын бер тапкыр Сезгә рәхмәтебезне белдерәбез. Очрашудан барыбыз да рух күтәренкелеге алдык, күңелләребездә бары тик җылы хис-тойгылар гына калды. Рабит абыйның китапханәбездә булган барлык китапларын да алып киттеләр, бу инде очрашуның файдалы нәтиҗәсе турында сөйли. Тагын да очрашулар көтеп калабыз».