Равил Үтәбай-Кәриминең тууына 80 ел

2013 елның 30 сентябре көнне Татарстан Республикасы Милли китапханәсенең җыелышлар залында күренекле галим, шәркыять һәм исламият белгече Равил Үтәбай-Кәримине искә алу мәҗлесе узды.

Бу елның 30 августында олуг галим һәм мөхтәрәм остаз Равил әфәндегә 80 яшь тулган булыр иде. Шәхесне искә алу мәҗлесендә Разил Вәлиев, Рабит Батулла, Рәфыйк Мөхәммәтшин, Ильяс Җиһаншин, Наил Камбеев, Ирек Һадиев, Җәүдәт Миңнуллин, Рамил Исламов, Раиф Мәрданов, Фәния Хуҗәхмәт, Рамил Миңнуллин, Фәрит Шәкүров, Рәшит Минһаҗ, Айрат Заһидуллин катнаштылар. Мәҗлесне Ислам динен кабул итүнең 1000 еллыгы исемендәге мәдрәсә шәкерте Габдрахман әфәнде Коръән сүрәләрен укып ачып җибәрде, мәдрәсә ректоры Ильяс хәзрәт Җиһаншин галимнең рухына дога кылды. Кунаклар Равил Үтәбәй-Кәрими турында җылы истәлекләре белән уртаклаштылар. Рабит Батулла үзенең Равил Үтәбай-Кәрими белән магнитофон тасмасына яздырып алынган әңгәмәләрен алып килгән иде. Әлеге язмаларның бер өлешен тыңлау Равил Үтәбай-Кәриминең чын мәгънәсендә искиткеч зирәк акыллы, тирән хәтерле, бай, матур телле галим булганлыгын кабат искә төшерде.

Әлеге мәҗлес катнашучылар күңелендә якты хәтирәләр уятты, алдагы көннәрдә галимнең мирасын барларга, кадерләп сакларга, өйрәнергә һәм яшь буыннарга җиткерергә кирәк дигән фикерне ныгытты.