Татарстан Республикасы Милли китапханәсе «Җиһанов укулары – 2013» II нче фәнни-гамәли конференциясендә катнашты

2013 нче елның 7 нче октябрендә Татарстан Республикасы Милли китапханәсенең сәнгать бүлеге хезмәткәрләре «Заманча музыка мәдәнияте контекстында Нәҗип Җиһановның иҗади мирасы» темасына Казан консерваториясе, Татарстан Республикасы Милли музее һәм композитор Нәҗип Җиһанов музее бергәләшеп уздырган «Җиһанов укулары – 2013» II нче фәнни-гамәли конференциясендә катнашты.

Конференциядә китапханә хезмәткәрләре «Н.Г.Җиһановның Казан шәһәрендәге эре китапханәләр фондларында сакланучы ноталы әсәрләре тупланмасы» дигән доклад белән чыгыш ясадылар. Чыгышның төп максаты ТР Милли китапханәсенең сәнгать бүлегендә әзерләнгән «Татарстанның музыкаль мирасы» библиографик белешмәлегенә күзәтү ясау, Н.Г.Җиһановның китапка кертелгән 43 басма әсәренә анализ бирү иде. Әлеге белешмәлек киләчәктә республикабыз композиторлары иҗаты буенча биобиблиографик күрсәткечләр төзү эшендә башлангыч булыр дигән ышаныч белдерелде.

Сәнгать бүлеге хезмәткәрләренең чыгышы конференциядә катнашучыларда зур кызыксыну уятты һәм утырыш ахырында композитор Н.Г.Җиһанов музее хезмәткәрләре белән алга таба тыгыз хезмәттәшлек урнаштыру турында килешенде.