Вакытлы матбугат бүлегенең Олимпиадага багышланган чаралары

Сочида узачак XXII кышкы Олимпия уеннары алдыннан 2014 нче елның 24 нче гыйнварында Татарстан Республикасы Милли китапханәсенең вакытлы матбугат бүлеге хезмәткәрләре Казанның 18 нче номерлы гимназиясендә «Чынык, таза-сау бул!» дип исемләнгән мәгълүмат көне уздырдылар. Китапханәчеләр тарафыннан спорт темасына чыгучы газета-журналларга күзәтү ясалды, күргәзмә оештырылды. Алар укучыларның төп игътибарын таза-сау яшәү рәвешенә, физкультура һәм спорт белән актив шөгыльләнүгә, Олимпия уеннары тарихына юнәлтте, күренекле спортчылар тормышы турында сөйләде.

2014 нче елның 30 нчы гыйнварында вакытлы матбугат бүлегендә «Олимпиада йолдызлары» дигән күргәзмә ачыла, ул 28 нче февральгә кадәр эшләячәк. Анда Олимпия уеннары тарихына караган мәкалә-язмалар урын алачак, Россия һәм Татарстан спортчыларының казанышлары яктыртылачак.

Мәгълүмат көннәре февраль ае дәвамында Казан шәһәренең югары уку йортларында һәм мәктәпләрендә тагын уздырылачак.