Әдип белән очрашу

Татарстан Республикасы Милли китапханәсенең фәнни-методик бүлеге хезмәткәре Гөлнара Хуҗина, республикабызның Теләче районы үзәге Теләче авылына барып, язучы, хокук белгече, Татарстанның атказанган юристы Фәнил Ислам улы Галиев белән очрашты.

Быел әдипкә 75 яшь тула. Шушы уңайдан Милли китапханәнең фәнни-методик бүлегендә аның иҗат эшчәнлегенә багышланган һәм нигездә китапханәчеләргә тәгаенләнгән методик-библиографик ярдәмлек төзү эше башланды. Бүлек хезмәткәре, әлеге ярдәмлекнең эчтәлеген тагын да кызыклырак һәм файдалырак итү максатыннан, Фәнил Галиевнең үзеннән интервью алуны кирәк дип тапкан.

Ф.И.Галиев Теләче районында яшәп иҗат итә, белгечлеге буенча прокурор. Хәзерге көнгә кадәр аның 14 китабы рус һәм татар телләрендә басылып чыккан. «Үтерүче якында гына йөри» дип исемләнгән китабы исә 1994 елда Татарстан Милли китапханәсе оештырган «Ел китабы» бәйгесендә III урынны яулады.
Фәнил Галиев – юстиция киңәшчесе, күп тапкырлар СССР Генераль прокуроры, Россия Федерациясе һәм Татарстан Республикасы прокурорлары тарафыннан бүләкләнгән, дистәләгән Мактау грамоталарына, «Хезмәт ветераны», «Прокуратура ветераны» медальләренә лаек булган. Әдәби иҗаттан тыш, Фәнил Ислам улы уфология, рәсем ясау, музыка, асылташлар җыю, спорт белән мавыга.
Ул ясаган картиналарны, өендәге музей бүлмәсен китапханә хезмәткәре фотога төшереп кайткан. Шул фотоларның кайберләре сайтка керүчеләр игътибарына да тәкъдим ителә.