Сарман Үзәк китапханәсендә очрашу

10 нчы апрель көнне Сарман районы Үзәк китапханәсендә, әсәрләре Татарстан Республикасы Милли китапханәсе ел саен үткәрә торган «Ел китабы» бәйгесендә катнашып, сигез тапкыр I нче урыннарга лаек булган язучы, Татарстан Республикасының Габдулла Тукай исемендәге Дәүләт премиясе лауреаты Нәбирә Гыйматдинова белән очрашу узды. Аны Милли китапханәнең фәнни-методик бүлеге баш китапханәчесе Зәйнәп Җамалиева оештырды.

Очрашу кичәсен Сарман Үзәк китапханәсенең методик бүлеге мөдире Алсу Нариманова башлап җибәрде. Катнашучыларны сәламләгәннән соң, ул Нәбирә Гыйматдиновага сүз бирде. Язучы үзенең тормыш һәм иҗат юлы белән таныштырды. Очрашуда районның «Җәлил чаткылары» әдәби берләшмәсе җитәкчесе Индус Мәрдәншин, Татарстан Язучылар берлеге әгъзасы, шагыйрә Рухия Ахунҗанова, Сарман гимназиясенең татар теле һәм әдәбияты укытучысы Кифая Заһирова Нәбирә Гыйматдинованың әдәби иҗаты хакында үз фикерләре белән уртаклаштылар. Үзәк китапханәнең библиография бүлеге мөдире Гөлнур Мадъярова язучының иҗатына багышланган күргәзмәгә күзәтү ясады.

Кичә ахырында Нәбирә Гыйматдинова катнашучыларның сорауларына җавап бирде. Китап укучылар очрашудан бик канәгать калдылар.