«Рисаләи Газизә» китабын тәкъдим итү кичәсенә чакырабыз

Таҗеддин Ялчыгол ярты гасырдан артык гомерен халыкны белемле, тәрбияле итүгә багышлый. Аның мөгаллимлеге руханилык эшчәнлеге белән үрелеп бара. Әдип халыкта гасырлар буена тупланып килгән ислам рухын сакларга һәм ныгытырга тырыша. «Рисаләи Газизә» – Таҗеддин Ялчыгол иҗатында гына түгел, ә, гомумән, Тукайгача чор татар әдәбияты тарихында мөһим ядкәр; әдәбиятны, динне, телне, мәгарифне, гореф-гадәтләрне, гыйлем тарихын тикшерүдә мөһим чыганак.
«Рисаләи Газизә» – ХIХ нче гасыр урталарыннан башлап, басма һәм кулъязма рәвештә гаять киң таралган китап. Ул мәдрәсәләрдә дәреслек итеп тә кулланыла. Хәзерге вакытта татар халкының рухи мирасы ядкарләренең кабат нәшер ителүе бик сөендерә.
2013 нче елның 18 нче апрелендә сәгать 10 да Татарстан Республикасы Милли китапханәсенең төп бинасында (Казан шәһ., Кремль ур., 33 нче йорт) Таҗеддин Ялчыголның «Рисаләи Газизә» китабын тәкъдим итү кичәсе узачак. Әлеге чарада дин әһелләре, галимнәр, язучылар катнашачак.
Кичәгә рәхим итегез!