«Рисаләи Газизә» китабын тәкъдим итү кичәсе узды

2013 нче елның 18 нче апрелендә Татарстан Республикасы Милли китапханәсенең төп бинасында (Казан шәһ., Кремль ур., 33 нче йорт) Таҗеддин Ялчыголның «Рисаләи Газизә» китабын тәкъдим итү кичәсе узды. «Рисаләи Газизә»нең яңа басмасы Диния нәзарәте игълан иткән «2014 ел - дини гореф-гадәтләрне торгызу елы» кысаларында дөнья күрде. Бабаларыбызның рухи мирасын торгызу, бүгенге буынга кайтару ниятеннән басылды.
Китап «Хозур» нәшрият йорты тарафыннан нәшер ителде. Әсәрне басмага танылган галим Хатыйп Йосыф углы Миңнегулов әзерләде.
Кичәне Татарстан Республикасы мөфтие Камил хәзрәт Сәмигуллин Коръән аятьләре укып ачып җибәрде, олуг мәгърифәтче Таҗеддин Ялчыголның рухына дога кылынды. Дин әһелләре, галимнәр, күренекле шагыйрьләр, язучылар: Хатыйп Миңнегулов, Фәрит Яхин, Сәлим Гыйләҗетдинов, Фоат Галимуллин, Мәсгуть Гайнетдинов һәм башкалар тирән эчтәлекле чыгыш ясадылар.
Татарстан Республикасы Милли китапханәсенең татар әдәбияты һәм туган якны өйрәнү бүлеге хезмәткәрләре «Таҗеддин Ялчыгол – җуелмас рухи мирас калдырган шәхес» дип исемләнгән тирән эчтәлекле күргәзмә оештырды. Әдипнең Милли китапханә фондларында сакланган басмалары белән янәшә, әдәбият белгечләре һәм дин әһелләренең әдип иҗатын чагылдырган хезмәтләре урын алды.
Китап тәкъдим итү кичәсендә катнашучылар күргәзмәне кызыксынып карадылар, китапханәчеләр хезмәтен югары бәяләп, аларга рәхмәт сүзләрен җиткерделәр.