Китапханәчеләр «Башваткыч» тапшыруында

Май аеның соңгы көннәрендә «Татарстан–Яңа гасыр» телеканалында «Башваткыч» тапшыруының 100 нче юбилей чыгарылышы күрсәтелде. Әлеге чыгарылыштагы уенның төп катнашучылары да, җанатарлары да китапханәчеләр булды.

Арча районының Яңа Кишет авылы китапханәчесе Надия Йосыпова, Түбән Кама шәһәре һәм районы Үзәк китапханәсе хезмәткәре Әнфисә Фәйзетдинова, Казан шәһәре китапханәләр челтәренең Үзәк китапханәсе хезмәткәре Ләлә Төхвәтуллина китап–китапханә–әдәбият–матбугат темасына төзелгән кроссвордның катлаулы сорауларына тирләп-пешеп җавап эзләсә, Татарстан Республикасы Милли китапханәсе хезмәткәрләре аларга көч һәм дәрт биреп, ярдәм итеп утырды. Уен бер тында, кызыклы һәм мавыктыргыч рәвештә узды, Татарстанның халык артисты Җәвит Шакиров, тапшыруның оста алып баручысы буларак, җор сүзләре, көлкеле шаярулары белән уенчыларның кәефен күтәрде. Алар да җавапсыз калмады – өчесе дә нәфис сүзгә сәләтләрен күрсәтеп, тамашачыларга матур шигырьләр укып ишеттерделәр. «Китапханәчеләр һәрдаим гыйлем һәм мәгълүмат диңгезендә йөзәләр, барысын да белергә тиешләр», – дигәннәрдер, ахры, кроссвордны төзүчеләр сораулар арасына шактый авырларын да керткәннәр. Әмма, шуңа карамастан, сорауларның һәммәсенә дә җаваплар табылды, кроссворд шакмакларының барысы да тулды. Надия Йосыпова, 13 балл җыеп, беренче урынга чыкты һәм җиңүче дип игълан ителде. Аңа, 8 балл җыйган Әнфисә Фәйзетдиновага, 4 баллга ия булган Ләлә Төхвәтуллинага һәм, җанатарлар арасыннан уенчыларга ярдәм итеп, 3 балл туплаган Ирек Һадиевка «Татарстан–Яңа гасыр» телевидениесенең, тапшыру спонсорларының истәлекле бүләкләре тапшырылды.

Алып баручы Надия Йосыповага супер-уенда көчен сынап карарга тәкъдим итте. Китапханәче ханым, башта каршы килсә дә, җанатарларның, кызының кыставыннан, үгетләвеннән соң уенны дәвам итәргә ризалашты. Экранга бер генә сүзе чыгарылган, башка сүзләре урынында буш шакмаклар куелган татар халык мәкален 1 минут эчендә хәтер төпкелләреннән эзләп табарга (әгәр белсәң!) һәм әйтергә кирәк иде. Бу юлы бирем супер-катлаулы булмады, Надия Йосыпова җавапны тиз һәм җиңел тапты. Телевидение студиясе шау-гөр килде, җанатарлар җиңүчене алкышларга, «Молодец!», «Афәрин!» дигән шатлыклы авазларга күмде. Тапшыруның төп бүләге – алдарак булган бик күп уен-чыгарылышларның җиңүчеләренә тәтемәгән 14 нче модельле ап-ак «Лада» машинасы – ниһаять, хуҗасын тапты.
Килеп ирешкән хәбәрләргә караганда, уен телевизор караучыларга да бик ошаган. Бик күбесе гап-гади, әмма уңган һәм булдыклы, укымышлы авыл китапханәчесенең зур бүләк – автомобиль отуына чын күңелләреннән сөенүләрен белдерде.

«Татарстан–Яңа гасыр» телеканалы Интернет-сайтының «Видеоархив» бүлегенә http://tnv.ru/main/katalog/razvlekatel_nye/bashvatkych адресы белән кереп, тапшыруны тулаем карарга мөмкин.