14 октябрь – Халыкара стандартлаштыру көне

Милли китапханәнең патентлар бүлегендә (К.Маркс ур., 36 нчы йорт) Халыкара стандартлаштыру көненә багышланган «Продукция сыйфаты белән идарә итү» күргәзмәсе эшләп килә.

Стандартлар дөньяны кеше өчен җайлаштыра, продукциядән, хезмәт күрсәтүдән, бина һәм корылмалардан файдалануны җиңеләйтә. Алар иминлек һәм эргономика җәһәтләрен күздә тота, сынаулар үткәрүнең хәзерге заман ысулларын үз эченә ала. Болар барысы да югары сыйфатлылыкны тәэмин итү белән бәйле.

Күргәзмәдә урын алган әсбапларда түбәндәге сорауларга җавап табып була:
- стандартлаштыру һәм сертификацияләү буенча норматив документлар һәм аларның төрләре;
- стандартлаштыру һәм сертификацияләүнең асылы һәм эчтәлеге;
- заманча сыйфат менеджментының концепциясе;
- безнең илдә һәм чит илләрдә сыйфат белән идарә итү тарихы;
- сыйфат стандартлары системасы;
- сыйфат белән идарә итү ысуллары һәм кораллары;
- сыйфат менеджменты системаларын сертификацияләү;
- лицензияләү системасы.

Бүлек китапханәдән файдаланучыларга стандартларның электрон китапханәсен, төрле сериядәге һәм вариантлардагы сыйфат системаларының Халыкара стандартларын, «Продукция һәм хезмәт күрсәтү сыйфаты белән идарә итү» дип аталган норматив документлар электрон китапханәсен, шулай ук ИСО стандартлары нигезендә сертификацияләүгә караган басмалар тәкъдим итә.

Күргәзмәдә тәкъдим ителгән әдәбият сәнәгатьнең төрле тармакларында эшләүче белгечләргә, менеджерларга, маркетологларга, студентларга, аспирантларга һәм мөгаллимнәргә кызык булачак.