«Жизнь для вечности» китабын тәкъдир итү

2012 нче елның 14 нче февралендә Татарстан Республикасы Милли китапханәсенең сәнгать бүлегендә (Театр ур., 5 нче йорт) танылган музыка белгече Г.М.Канторның 1966-1979 нчы елларда Казанда яшәп иҗат иткән күренекле совет дирижеры Н.Рахлин тормышына багышланган «Жизнь для вечности» китабын презентацияләү кичәсе узды.
Китапны автор – Георгий Михайлович Кантор үзе – залга җыелган халыкка тәкъдим итте. Ул аның язылу тарихы, китапка кертелгән истәлекләрнең авторлары һәм, әлбәттә инде, үзенең якын дусты, легендар Натан Рахлин турында сөйләде.
Георгий Михайлович 1996 нчы елдан Израильдә яши, ләкин ТР Милли китапханәсе белән һәрвакыт элемтәдә тора. Туган илгә сирәк кенә кайтулары вакытында китапханәнең сәнгать бүлегенә килергә мөмкинлек таба. Г.М.Кантор белән очрашулар – музыка сөючеләр, китапханәдән файдаланучылар өчен һәрвакыт бәйрәм.