1812 нче елгы Ватан сугышына 200 ел

ТР Милли китапханәсенең сәнгать бүлеге китапханәдән файдаланучылар һәм киң җәмәгатьчелек игътибарына 1812 нче елгы Ватан сугышына 200 ел тулуга багышланган «Булган ди ич каты сугышлар бик; Сөйлиләр ич: – әле ниндиләр! – дип» дигән күргәзмә тәкъдим итә.
1812 нче елгы Ватан сугышы мәңгегә халык хәтерендә калды. Бу тарихи вакыйга Россиянең генә түгел, ә бәлки бөтен Европаның киләчәк сәяси һәм иҗтимагый тормышы үсешен билгеләде.

Күргәзмә өч бүлектән тора:
1. «Уникенче елның мәңгелек даны». Биредә шул чорда төрле илләрдәге тормышны яктырткан документлар һәм сугышның һәр көнен диярлек күз алдына китерергә мөмкинлек биргән елъязмалар тәкъдим ителә.
2. «Рәссам пумаласы сурәтләгән тарих». Күпләребезгә мәктәп елларыннан ук сугыш герое Е.В.Давыдовның О.Кипренский ясаган портреты, А.Кившенконың «1812 нче елда Филяда хәрби совет» дигән атаклы картинасы яхшы таныш. Әлеге һәм башка картиналарның, 1812 нче елгы сугыш геройлары портретларының репродукцияләре белән Сез бу бүлектә таныша алачаксыз.
3. «Дәверләр кайтавазы». Марш һәм романслар – сугыш чорында музыкада үсеш алган ике юнәлеш. Әлеге бүлектә романсларның ноталары, тавыш язмалары, текстлары урнаштырылган.

Күргәзмә шул заманның героик, патриотик рухын тоярга, халкың һәм илең өчен горурлык хисе кичерергә мөмкинлек бирә.

Сәнгать бүлегенә (Театр ур., 5нче йорт) рәхим итегез! Без Сезнең белән очрашуга шат булачакбыз!