Милли китапханә - «Татнет йолдызлары - 2011» Халыкара Интернет-проектлар бәйгесе дипломанты

2011 елда Татарстан Милли китапханәсе өченче тапкыр «Татнет йолдызлары» Интернет-проектлары бәйгесендә катнашты. "Татнет йолдызлары" интернет-проектлар бәйгесе Матбугат һәм массакүләм коммуникацияләр буенча республика агентлыгы тарафыннан 2003 елдан бирле үткәрелеп килә. Конкурс ел саен Интернет челтәренең татар сегментында аеруча зур әһәмияткә ия булган, Татарстан Республикасы дәүләт телләрендә (татарча һәм/яисә рус телендә) яисә Татарстан Республикасына багышлап башка телләрдә ясалган мәгълүмати ресурсларны барлау максатыннан үткәрелә.

Татарстан Республикасы милли китапханәсе Интернет челтәрендә электрон китапханә эшен алып барган өчен бу бәйгенең дипломы белән бүләкләнде - http://kitaphane.tatarstan.ru/tat/e-library.htm , http://kitaphane.tatarstan.ru/rus/e-library.htm.

Тугызынчы бәйгедә барлыгы 220 Интернет-сайт катнашты. Бу бәйгегә гаризалар Казахстан, Украина һәм Кыргызстаннан, Татарстан, Башкортстан һәм Чувашия республикаларыннан, Оренбург, Чиләбе, Төмән, Киров, Саратов һәм Самара өлкәләреннән, Мәскәү, Санкт-Петербург, Новосибирск, Екатеринбург шәһәрләреннән, башка регионнар һәм шәһәрләрдән килгән иде.

Бәйгенең җиңүчеләре дип бу конкурста 41 сайт танылды. Бәйгедә җиңеп чыккан сайт төзү осталары арасында Татарстан Республикасы гына түгел, ә Казахстан Республикасы, Свердловск, Самара, Киров һәм Новосибирск өлкәләре осталары да бар.