«Республика Татарстан» газетасына – 95 ел

«Республика Татарстан» газетасы – республикабызның иң абруйлы вакытлы матбугат басмаларыннан берсе. 2012 нче елның апрелендә аның нәшер ителә башлавына 95 ел тулды. Шул уңайдан 14 нче май көнне Казан шәһәренең Идел буе районында урнашкан 150 нче мәктәп укытучылары катнашында «Республика Татарстан»ны укучылар конференциясе булып узды. Бу акция Татарстан Республикасы Милли китапханәсенең вакытлы матбугат бүлеге инициативасы белән оештырылды.

Укытучыларга газетаның бай тарихы, бүгенгесе хакында сөйләделәр.

Бер гасырга якын вакыт эчендә газета берничә тапкыр исемен алмаштырса да, асылын һичкайчан җуймады: һаман да халыкка тугрылык белән хезмәт итте һәм итә.

Газетаның чыга башлавыннан алып, хәзерге көнгә кадәр дөнья күргән саннары белән Татарстан Республикасы Милли китапханәсенең вакытлы матбугат бүлегендә (Казан шәһәре, К.Маркс ур., 36 нчы йорт) танышырга мөмкин.