30 июнь – Уйлап табучылар һәм рационализаторлар көне

2012 нче елның 30 июнендә Россиядә уйлап табучылар һәм рационализаторлар көне билгеләп үтелә. Бу уңайдан Татарстан Республикасы Милли китапханәсенең патентлар бүлеге (К. Маркс ур., 36 нчы йорт) китапханәдән файдаланучылар игътибарына «Интеллектуаль байлык» исемле күргәзмә тәкъдим итә.
Кешелек тарихы ачышлар һәм уйлап табулар белән тыгыз бәйләнештә. Уйлап табуларсыз дөнья нинди булыр иде икән? Инновацияләрне фикерсез күз алдына китереп буламы? Хәзерге дөньяда кешенең иҗади эшчәнлегенә өстенлек бирелгәнлектән интеллектуаль капиталның әһәмияте көннән-көн арта.
Күргәзмәдә фән һәм техниканың өстенлекле юнәлешләре буенча, шулай ук хәзерге шартларда интеллектуаль милек объектларын, норматив-хокукый базаны, маркетинглы идарә итүне тасвирлаган материаллар урнаштырылган. Патентлы-лицензияле эшчәнлекне оештыру һәм интеллектуаль милекне саклау белән бәйле төп мәсьәләләр яктыртылган. Интернет челтәрендә, электрон китапханәләр системасында авторлык хокукларын тормышка ашыруга, халыкара хезмәттәшлеккә, фәнни-техник эшчәнлек нәтиҗәләрен булдыру һәм куллану буенча килешүләрне рәсмиләштерүгә караган тәкъдимнәргә зур игътибар бирелгән.
Күргәзмә уйлап табучылар, патент белгечләре, шулай ук студентлар, аспирантлар һәм патентлар турындагы мәгълүмат белән кызыксынучы барлык белгечләр өчен кызыклы булачак.