Йорт җиһазлары: стильләр тарихы

2012 нче елның 7 нче июненнән башлап ТР Милли китапханәсенең сәнгать бүлеге (Театр ур., 5 нче йорт) китапханәдән файдаланучылар игътибарына «Йорт җиһазлары: стильләр тарихы» исемле күргәзмә тәкъдим итә.
Кешелек мәдәнияте тарихы безгә өй җиһазлау предметларының күптөрле бай мирасын калдырды. Үзләренең формалары, пропорцияләре һәм бизәлешләрендә алар бер-берсен алмаштырган стильләр тарихын чагылдыралар. Шартларның төрлелегенә бәйле рәвештә формалашкан стильләрдә теге яки бу чорга характерлы билгеләр чагыла.
Һәр чор интерьер төшенчәсенә үз өлешен кертә. XVII нче гасырда Франциядән декоратив бердәмлек килә. Тәрәзәләрдәге драпировка, стеналардагы тукыма һәм җиһаз тышлыкларын үзара яраклаштыру нәкъ менә шул вакытта башлана. Бу хакта һәм башка бик күп кызыклы мәгълүматларны күргәзмәнең стильләр тарихына багышланган «Нәзыйг матурлык» бүлегендә табарга мөмкин.
«Рус җиһазы» бүлегендә Россиядә булган тарихи вакыйгаларга бәйле рәвештә йорт һәм андагы җиһазларның үзгәрүен күзәтү мөмкинлеген бирүче әдәбият урнаштырылган.
«Рәсем һәм фактура» бүлегендә торак җиһазлауда күп гасырлар дәвамында кешелек тарафыннан кулланылган әйберләр: борынгы шпалер һәм гобелен, бизәкле эмаль һ.б. төшерелгән фотографияле альбомнар, китаплар куелган.