«Орнамент – дәвер хасияте»

Татарстан Республикасы Милли китапханәсенең сәнгать бүлеге китапханә хезмәтләреннән файдаланучылар игътибарына 24 нче июльдән башлап «Орнамент – дәвер хасияте» дигән күргәзмә тәкъдим итә.

Сәнгать тарихын тулаем алып карасак, без орнаментларның чиксез күптөрлелеген күрербез. Орнамент сәнгате дигән бу гаҗәеп күренеш ничек барлыкка килгән соң? Мәдәният тарихының буеннан буена адәм затын дулкынландырган һәм үзенә җәлеп итеп торган әлеге матурлыкның сере нәрсәдә? Барлык бу сихри образлар, композицияләр һәм ритмнар ниләрне чагылдыра, нәрсә аңлата? Орнаментлар белән очрашкан теләсә кайсы кеше аңында туган мондый сорауларга безнең күргәзмәдәге китаплардан, альбомнардан, брошюралардан җавап табарга мөмкин.

Күргәзмә өч бүлектән тора:

Беренчесе «Тере» орнамент сәнгате» дип атала. Архитектура, интерьерлар төзү, йорт җиһазлау сәнгате, зәркәнчелек, тукучылык, кием-салым тегү һ.б. тармакларда эшләүчеләрнең һәммәсенә дә орнамент тарихын белү зарур, ни өчен дигәндә, бизәк төшерү беркайчан да әһәмиятен югалтмый.

Теләсә кайсы милләтнең, кайвакыт аерым географик өлкәнең дә үзенә хас орнаментлар җыелмасы була. Татар халык орнаментлары сәнгате, рус, удмурт, чуаш, башкорт һ.б. халыкларның милли бизәкләре белән кызыксынучылар күргәзмәнең «Төрле халыкларның орнамент сәнгате» дигән икенче бүлегендәге китап-альбомнарга мөрәҗәгать итә ала.

Үзенең кабатланмас бизәкләү рәвешен тудырырга теләге булганнарга безнең күргәзмәнең өченче бүлеге ярдәм итәчәк. Ул «орнамент» дигән гүзәл сәнгатьнең үзенчәлекләрен өйрәнү һәм аны гамәлдә куллану алымнарын тәкъдим итә.

Сәнгать бүлегенә (Казан, Театр ур., 5) рәхим итегез! Сезне шатланып каршы алырбыз!