Казан – спорт башкаласы

2012 нче елның 1 нче августыннан башлап Татарстан Республикасы Милли китапханәсенең вакытлы матбугат бүлеге (Казан шәһәре, К.Маркс ур., 36 нчы йорт) китапханәгә килүчеләр игътибарына «Казан – спорт башкаласы» дип исемләнгән күргәзмә тәкъдим итә. Ул ел саен 30 нчы августта бәйрәм ителә торган Республика һәм шәһәр көненә багышлана.

2013 нче елның 6–17 нче июль көннәрендә Казанда узачак XXVII нче Бөтендөнья җәйге Универсиадага – студентлар һәм яшьләр спорт ярышларына – әзерлек бара. Соңгы берничә елда Татарстан башкаласында дистәләгән санда төрледән-төрле спорт комплекслары төзелде, физкультура-спортка һәм сәламәт яшәү рәвешенә игътибар артты.

Шушы көннәрдә исә Бөекбритания башкаласы Лондонда дөнья спортындагы иң әһәмиятле вакыйгаларның берсе – ХХХ нчы җәйге Олимпия уеннары уза. Әлбәттә, Татарстан уенчыларының ничек чыгыш ясаулары һәм уңыш-казанышлары күпләрне кызыксындыра.

Күргәзмәгә куелган «Татарстан», «Моя универсиада», «Спортивный Татарстан», «Идел», «Салават күпере», «Безнең спорт», «Советский спорт» һ.б. журналлар һәм газеталар аша әлеге темага кагылышлы бик күп мәкалә-язмалар белән таныша аласыз.

Күргәзмә 31 нче августка кадәр эшләячәк. Рәхим итегез!