Җитәкчелек итүгә процесслы якын килү турында

Татарстан Милли китапханәсенең патентлар бүлегендә (Казан, К.Маркс урамы, 36 нчы йорт) 30 нчы сентябрьгә кадәр «Җитәкчелек итүгә процесслы якын килү» исемле күргәзмә эшли.

Хәзерге вакытта базар икътисады эшләп чыгарыла торган продукциянең сыйфатына югары таләпләр куя. Сыйфат белән идарә итү – предприятие менеджментында һәм аның конкуренциягә сәләтлелеген булдыруда төп юнәлешләрнең берсе. Көндәлек гамәли эшкә процесслы якын килү алымын кертү, Россия оешмалары өчен яңалык булса да, бик мөһим. Предприятие һәм оешмалар белән җитәкчелек итүгә процесслы якын килү сыйфат стандартларының төп принциплары рәтендә тора.

Күргәзмәгә куелган басмаларда төп процессларны сайлау кагыйдәләре бирелгән, бизнес-процессларны тасвирлау һәм модельләштерү ысуллары чагылыш тапкан. Оештыру процессларын тасвирлауның һәм көйләүнең методикасы җентекләп аңлатылган. Җитәкчелек итүгә процесслы якын килүне гамәлгә кертү турындагы һәм башка бик күп файдалы мәгълүматлар бар.

Әлеге күргәзмә идарә итү, мәгълүматлаштыру өлкәләрендә эшләүче белгечләргә һәм югары уку йортлары студентларына тәгаенләнгән.