Татар милләтенең мәшһүр шәхесе Җамал Вәлиди

2012 нче елның 1 нче октябре көнне Татарстан Республикасы Милли китапханәсенең Зур уку залында (Казан, Кремль ур., 33 нче йорт) күренекле әдәбият галиме, публицист Җамалетдин Вәлидинең (1887-1932) тууына 125 ел тулуга багышлап «Намус, гаделлек, вөҗдан» дип аталган күргәзмә эшли башлады.

Җамал Вәлиди – ХХ гасырның дәһшәтле утызынчы елларында һәлак ителгән шәхес культы корбаннарының берсе. Ул, репрессияләрнең беренче дулкынына эләгеп, 45 яшендә 1932 елда иҗат эшчәнлегенең иң югары ноктасында чагында юк ителә. Бу талантлы шәхеснең кыска гына гомерендә иҗат итеп калдырган мирасы зур, бай, фәнни яктан әһәмиятле, кыйммәтле. Аның күпләгән хезмәтләре, мәкаләләре татар әдәбият белеме тарихының югалмас сәхифәләрен тәшкил итә.

Җамал Вәлиди – күренекле тел галиме дә. Әлеге фән юнәлешендә аның «Татар теленең грамматикасы» (1919) хезмәте, 1919-1931 елларда төрле журнал һәм җыентыкларда басылган күпсанлы мәкалә-тикшеренүләре бар. 1927-1929 елларда ике зур том булып басылып чыккан «Татар теленең тулы сүзлеге» аеруча зур әһәмияткә ия.

Күргәзмәдә Җамал Вәлидинең ХХ гасыр башында дөнья күргән китаплары белән танышырга мөмкин. Шулай ук әдипнең төрле елларда «Шура», «Безнең юл», «Аң», «Мәгариф» журналларында басылган мәкаләләрен күрергә була.

Күргәзмәдә, әдипнең хезмәтләре белән беррәттән, аның турындагы әдәбият та урын алган.

Күргәзмә 2013 нче елның 10 нчы гыйнварына кадәр эшләячәк. Рәхим итегез!