Халык каһарманнарының бөек батырлыклары

Татарстан Республикасы Милли китапханәсенең Зур уку залында (Казан шәһәре, Кремль урамы, 33 нче йорт), 1812 нче елгы Ватан сугышының 200 еллыгы уңае белән, китапханәнең кулъязмалар һәм сирәк китаплар бүлеге хезмәткәрләре тарафыннан «Халык каһарманнарының бөек батырлыклары» дип исемләнгән күргәзмә оештырылды.

Күргәзмәнең максаты – ХIХ нчы гасырның беренче яртысында басылган, Россия армиясенең һәм халкының ул чорда гаять зур саналган Наполеон гаскәре белән батырларча сугышын тасвирлаган сирәк басмалар белән таныштыру.

Күргәзмәдәге китапларның бер өлеше башкомандующий Михаил Илларионович Кутузов җитәкчелеге астында дошман белән сугышкан, яу кырында зур батырлыклар кылган рус полководецлары һәм генераллары турында. Шулай ук Бородино сугышын һәм Малоярославец бәрелешен чагылдырган кызыклы архив материаллары тәкъдим ителә. 1812 нче елда Россиянең күп төбәкләрендә, шул исәптән Казанда да оешкан халык ополчениеләре хакындагы тарихи мәгълүматлар белән дә танышырга мөмкин.

Күргәзмә 2012 нче елның ахырына кадәр эшләячәк.