Татарстанның Халыклар дуслыгы йорты белән танышу

ТР Милли китапханәсе хезмәткәрләре 2012 нче елның 27 нче ноябрендә Татарстан Халыклар дуслыгы йортының яңа бинасында булдылар. Аны тантаналы рәвештә, Татарстан халыклары Ассамблеясына 20 ел тулган көннәргә туры китереп, республикабыз җитәкчелеге катнашында, 2012 нче елның 29 нчы августында ачтылар.
Татарстанның Халыклар дуслыгы йорты хезмәткәрләре бина эчендә уздырган кызыклы экскурсиядә китапханәчеләр милли җәмгыятьләрнең эш бүлмәләрендәге экспозицияләр белән таныштылар. Татарстанда яшәүче 115 милләт вәкилләренең нәтиҗәле этномәдәни эшчәнлеге өчен кирәкле булган концертлар залы, тантаналар залы (күргәзмәләр оештыру өчен дә бик уңайлы), конференцияләр залы, сөйләшүләр бүлмәсе, «Наш дом – Татарстан» журналы редакциясе, мәгълүмати үзәк, хореография залы, Дуслык музее, милли оешмаларның якшәмбе мәктәбе экскурсантларда зур тәэсирләр калдырдылар.
ТР Милли китапханәсе хезмәткәрләре Татарстанның Халыклар дуслыгы йорты директоры Ирек Илдус улы Шәрипов белән дә очраштылар. Ул оешманың барлыкка килү тарихы турында сөйләде, киләчәккә планнары белән уртаклашты. Әлеге дустанә әңгәмә барышында милли мәдәниятләрне торгызу, саклау һәм үстерүгә мөнәсәбәтле бу ике оешманың хезмәттәшлеген ныгыту турында килешенде.
Милли китапханә хезмәткәрләре Татарстанның Халыклар дуслыгы йорты китапханәсенә бүләк китаплар тапшырдылар. Алар зур кызыксыну һәм рәхмәт хисләре белән кабул ителде.