Гыйнвар ае юбилярлары

2013 нче елның гыйнвар ае юбилейларга бай. Күркәм традицияне дәвам итеп, Татарстан Республикасы Милли китапханәсенең сәнгать бүлеге китапханәдән файдаланучылар игътибарына «Истәлекле һәм онытылмас даталар календаре» циклыннан күргәзмәләр тәкъдим итә.
15 нче гыйнварда Татарстанның халык артисты (1970), Россиянең атказанган артисты (1985) Әлфия Авзаловага (1933) 80 яшь тула. Бу күренекле датага багышланган күргәзмәдә җырчының тормыш һәм иҗат юлы турындагы китаплар һәм брошюралар белән танышырга, җырларының аудиоязмаларын тыңлап, татар эстрадасы легендасының сихри тавышына сокланырга мөмкин.
16 нчы гыйнварда бөек режиссер, актер һәм педагог Константин Сергеевич Станиславскийның (1863-1938) тууына 150 ел тула. К.С.Станиславскийга багышланган күргәзмәдәге китаплар һәм альбомнар сәхнә сәнгате үсешенә зур өлеш керткән, бөтен дөнья театр әһелләренең тирән ихтирамына лаек даһи шәхеснең тормыш һәм иҗат юлы сәхифәләрен чагылдыра. М.Горький Станиславский турында бик хаклы рәвештә: «...бөек артист һәм көчле хезмәткәр, артистлар тәрбиячесе», – дип яза.
Күргәзмәгә (Театр ур., 5 нче йорт) рәхим итегез!