«Бөек якташыбыз турында»

ТР Милли китапханәсенең сәнгать бүлеге (Казан, Театр ур., 5 нче йорт) җәмәгатьчелек игътибарына 2013 нче елның 9 нчы февраленнән бөек рус җырчысы Ф.И.Шаляпинның (1873-1938) тууына 140 ел тулуга багышланган күргәзмә тәкъдим итә.
Казан – бөек җырчының ватаны. Монда аның балачагы, үсмер еллары уза, монда ул, Казан шәһәр театрында опера музыкасын тыңлап, беренче тәэсирләрне ала. Монда беренче мәртәбә үзе дә театр сәхнәсенә аяк баса.
Бөек шәһеснең исеме һәм таланты казанлылар өчен, республикабыз өчен бик кадерле. Казанда 1999 нчы елда, җырчыга багышлап, дөньяда бердәнбер булган һәйкәл куелды. 1982 нче елдан башлап шәһәребездә иң зур опера фестивальләренең берсе – Ф.Шаляпин исемендәге Халыкара опера фестивале уза. Шушы көннәрдә фестивальнең 31 нче сезоны ачылды.
Күргәзмәгә куелган китаплар һәм мәкаләләр артистның иҗади тормышындагы күтәрелешләре һәм уңышлары, сынаулары, эмиграция еллары турында сөйли. Күргәзмә материаллары белән танышу С.В.Рахманинов сүзләрен дәлилли: «Чын әкияти сәләтле гаҗәеп артист һичкайчан онытылмас»...
Күргәзмәгә (Казан, Театр ур., 5 нче йорт) рәхим итегез!