Музыка һәм спорт гармониясе

2013 нче елның җәендә шәһәребездә узачак XXVII нче Бөтендөнья җәйге Универсиадасы башлануга да санаулы көннәр генә калып килә. Казан 9 көн дәвамында яшь спортчыларның җиңүче булырга көрәшүләре үзәгенә әвереләчәк. Универсиада – ул бәйрәм, ә бәйрәм – ул музыка, җыр һәм биюләр белән уза торган яхшы кәеф, күңел ачу.
ТР Милли китапханәсенең сәнгать бүлеге зур бәйрәм алдыннан җәмәгатьчелек игътибарына «Спорт музыкада» дип исемләнгән күргәзмә тәкъдим итә.
Музыка спортка ничек булыша? Спорт музыкасы нинди ул? Кем аны тудыра һәм ул кайчан барлыкка килгән? Бу һәм башка бик күп кызыксындырган сорауларга күргәзмәдә тәкъдим ителгән китап һәм брошюралардан, альбом һәм энциклопедик басмалардан җавап табарга мөмкин. Шулай ук танылган артистлар башкаруында спорт турындагы музыкаль язмаларны тыңларга мөмкин.
Күргәзмә ике өлештән тора:

1. «Трибуналар өстендә җыр яңгырый» – музыкаль язмалар һәм ноталы басмалар, җыр җыентыклары куелган.
2. «Музыка. Спорт. Бию» – бию музыкасына, ритмикага, гимнастикага багышланган басмаларны үз эченә ала.

Сәнгать бүлегенә (Театр ур., 5 нче йорт) рәхим итегез!