Тукай премиясенә 55 ел

Татарстан Республикасы Милли китапханәсенең күргәзмәләр һәм мәдәни программалар бүлегендә (Казан, Кремль ур., 33 нче йорт), Татарстан Республикасының Г.Тукай исемендәге Дәүләт премиясе гамәлгә куелуга 55 ел тулу уңаеннан, «Сөй гомерне, сөй халыкны, сөй халыкның дөньясын» дип исемләнгән китап күргәзмәсе ачылды.

1958 нче елда гамәлгә кертелгән Тукай премиясе Татарстан хөкүмәте бүләге булып санала һәм әдәбият, сәнгать өлкәсендә зур казанышларга ирешкән шәхесләргә, авторлар коллективларына бирелә. Күргәзмәдә төрле елларда Тукай премиясенә лаек булган күренекле татар язучыларының һәм әдипләренең китаплары урын алды.

Лауреатларның исемнәре генә дә күп нәрсәләр хакында сөйли. Алар арасында атаклы шагыйрьләр Хәсән Туфан һәм Сибгат Хәким, классик язучыларыбыз Әмирхан Еники, Аяз Гыйлаҗев, Туфан Миңнуллин, Атилла Расих, Ибраһим Салахов, безнең замандашларыбыз Разил Вәлиев, Рабит Батулла, Ринат Мөхәммәдиев, Лена Шагыйрьҗан һәм башкалар бар.

Күргәзмә 2013нче елның апрель ахырына кадәр торачак.