«Төп нөсхә көне»ндә – Милли китапханә ядкәрләре

2013 нче елның 15 нче апрелендә Татарстан Республикасы Милли китапханәсенең кулъязмалар һәм сирәк китаплар бүлеге, Габдулла Тукай әдәби музеенда оештырылган «Төп нөсхә көне»ндә катнашып, китап күргәзмәсе куйды.
Күргәзмәдә Татарстан Республикасы Милли китапханәсенең кулъязмалар һәм сирәк китаплар бүлеге фондларында саклана торган, Габдулла Тукай үзе исән вакытта басылып чыккан китаплар урын алды. Шагыйрьнең үзе исән чакта 22 исемдәге 46 китабы нәшер ителгән. Милли китапханә фондларында шуларның 14 исемдәгесе саклана. Аларның иң элекесе – 1907 нче елда бертуган Шәрәфләрнең китап нәшриятында «Шигырьләр китапханәсе» сериясеннән 3 нче дәфтәр булып «Г.Тукай шигырьләре» исеме белән дөнья күргән җыентыгы. Китап тиражы ул вакыт өчен генә түгел, хәтта безнең заманыбыз өчен дә бик күләмле – 4000 данә.
Халкыбызның олуг шагыйре Габдулла Тукай китапларының кулъязмалар һәм сирәк китаплар бүлегендә саклануы – биредә эшләүче хезмәткәрләр өчен дә зур җаваплылык. Ә аларның төп бурычы исә – бу кыйммәтле мирасны яшь буынга җиткерү һәм аның белән киң җәмәгатьчелекне әледән-әле таныштырып тору. Казандагы Габдулла Тукай музее белән Татарстан Республикасы Милли китапханәсе инде бишенче ел бу изге гамәлдә хезмәттәшлек итә.
Кулъязмалар һәм сирәк китаплар бүлеге: (843) 292-09-28.