Сугыш чоры җырлары

2013 нче елның 26 нчы апрелендә Татарстан Республикасы Милли китапханәсенең Зур уку залында (Казан, Кремль ур., 36 нчы йорт) музыкаль кунакханәнең Бөек Җиңүгә багышланган «Сугыш чоры җырлары» дип аталган чираттагы утырышы узды.
Залда РФнең атказанган, ТРның халык артисты Э.У.Җәләлетдинов һәм концертмейстер З.А.Ибраһимова башкаруында сугыш турындагы җырлар яңгырады. Рәсүл Гамзатов шигырьләренә язылган җырлар күңелләрне аеруча тәэсирләндерде.
Сәнгать бүлеге уздырган чараларда артистлар һәм килгән кунакларның бергәләшеп чыгыш ясаулары күркәм традициягә әйләнеп килә. Бу кичәдә дә катнашучылар һәм тамашачылар сугыш елларын искә төшерделәр, сугыш турында шигырьләр укыдылар. Әлеге чара беркемне дә битараф калдырмады. Концерт азагында барысы да бик теләп, җырчыга кушылып «Катюша», «Огонек», «День Победы» җырларын башкардылар.