Җирдә яшәү хакына

Татарстан Республикасы Милли китапханәсенең күргәзмәләр һәм мәдәни программалар бүлегендә (Казан, Кремль ур., 33 нче йорт) «Җирдә яшәү хакына» дип исемләнгән китап күргәзмәсе ачылды.

Бөек Ватан сугышы безнең ил халкының гына түгел, ә бар кешелек дөньясының яшәешен үзгәрткән, язмышын кирегә борган вакыйга булды. Бер генә совет гаиләсенә дә сугыш дәһшәте кагылмый калмагандыр.

Күргәзмәгә совет солдатларының данлы батырлыгы, Брест крепостен саклаучылар, герой-шәһәр Ленинград блокадасын һәм башкалар турында китаплар, сугышларда катнашучыларның истәлекләре тупланган басмалар куелган. Татар халкының кырыс сугыш көннәрендәге батырлыгын һәм каһарманлыгын чагылдырган әдәбият биредә аеруча зур урын били. Алман солдатларының мемуарларыннан сугышның язылмаган сәхифәләре хакында күп кенә кызыклы мәгълүмат табарга мөмкин.



Күргәзмә киң катлау китап укучылар өчен тәгаенләнгән һәм май азагына кадәр дәвам итәчәк.