24 нче май – Европаның парклар көне

Ел саен 24 нче майда билгеләп үтелүче Европаның парклар көненә багышлап Татарстан Республикасы Милли китапханәсенең сәнгать бүлеге (Казан, Театр ур., 5 нче йорт) «Бакча-парк сәнгате» дип исемләнгән күргәзмә тәкъдим итә.
Мең елдан артык тарихы булган бакча һәм парклар сәнгате, нәфис сәнгатьнең мөстәкыйль тармагы буларак, күптән формалаша. Үзенең универсаль эчтәлеге җәһәтеннән ул архитектура, шәһәр төзү, үсемлекчелек, көнкүреш йолалары, дини һәм фәнни карашлар, шулай ук даими үзгәреп торучы җәмгыяви фикерләр белән тыгыз бәйләнгән. Моны аның бөтен тарихы – Япония һәм Кытайның символик композицияләреннән, Испания ишегалды-патиоларыннан, Италия виллалары террасаларыннан алып, тантаналы француз регуляр ансамбльләре төзелешләренә яки рус ихата-йортларының шигъри дөньясына кадәрге үткәне – раслана.
Бакча-парк сәнгатенең уникаль үзенчәлеге булып кешегә, аның җаны белән тәненә тәэсир итү мөмкинлекләренең байлыгы һәм төрлелеге санала. Китапны укыйлар. Музыканы тыңлыйлар. Архитектураны карыйлар. Бакчаны исә без карыйбыз да, тыңлыйбыз да, тоябыз да, сулыйбыз да һәм хәтта татып та карыйбыз.
Күргәзмәгә китаплар, сурәтле альбомнар, уку әсбаплары, шулай ук укырга, карарга, тыңларга мөмкин булган аудио-видеоматериаллар урнаштырылган.
Сәнгать бүлегенә (Казан, Театр ур., 5 нче йорт) рәхим итегез! Без Сезнең белән очрашуга шат булачакбыз.