Татар халкының тарихи генеалогиясе

2013 нче елның 21 нче маенда ТР Милли китапханәсенең Зур уку залында А.Б.Беляевның «Историческая генеалогия татарского народа. Родственные династии и их роль в истории семьи, нации и государства» китабын тәкъдир итү кичәсе узды.
Китапның авторы – Адиль Бакый улы Беляев – гомере буе төзүчелек өлкәсендә эшләп, зур уңышларга ирешә. Төзелеш идарәсенең баш инженеры вазыйфасыннан төзелеш өлкәсендәге фәнни-тикшеренү институтының баш конструкторына кадәр хезмәт юлы уза. Россия Федерациясенең атказанган төзүчесе, Дәүләт премиясе лауреаты. Үзенең бөтен тормышы буена татар халкы генеалогиясе белән кызыксына, бу тематикага караган мәгълүматлар җыя һәм системага сала.
2000 нче елда А.Б.Беляевның 100 дән артык туганлык династияләрен эченә алган «Касимовские корни и современные ветви с древнейших времен» китабы дөнья күрә. «Историческая генеалогия татарского народа» китабы бу теманың логик дәвамы булып тора. Биредә милләт һәм дәүләт тарихында мөһим роль уйнаган, вәкилләре Россия җирлегендә, якын һәм ерак чит илләрдә яшәгән 350 дән артык тугандаш нәселләрнең шәҗәрәләре тупланган.
Тәкъдир итү кичәсен Татарстан Дәүләт Советының мәдәният, фән, мәгариф һәм милли мәсьәләләр Комитеты рәисе, Татарстан Республикасы Милли китапханәсенең Химаячеләр шурасы рәисе Вәлиев Разил Исмәгыйль улы ачып җибәрде. Ул әлеге хезмәтнең әһәмиятен һәм актуальлеген билгеләп үтте.
Адиль Бакый улы Беляев хезмәтенең туу тарихы турында кызыклы чыгыш ясады. Китапны әзерләүдә ярдәм итүчеләргә олы рәхмәтен белдерде.