Татар профессиональ музыкасының чишмә башында

2013 нче елның 23 нче августында атаклы татар совет композиторы Мәсгуть Гали улы Латыйповның тууына 100 ел тулды.

Мәсгуть Гали улы Латыйпов профессиональ татар музыка сәнгатенең иң башында торучыларның берсе. Ул – тынлы оркестр, хор өчен әсәрләр, инструменталь пьесалар, романслар һәм җырлар авторы.

Күпсанлы җынтыкларда басылып чыккан музыкаль әсәрләре, татар җырчыларының репертуарына кереп, республикадан тыш төбәкләрдә дә зур уңыш казанды. Ә «Кырда» исемле җыры халык күңелен чын-чынлап яулап алды.

Бөек Ватан сугышында катнашып, өч тапкыр яраланган Латыйпов М. Г. ике орден (Бөек Ватан сугышы, Кызыл Йолдыз орденнары) һәм сигез медаль белән бүләкләнгән.

Композиторның иҗат һәм музыкаль мәгърифәтчелек өлкәсендәге эшчәнлеге югары бәяләнде: 1957 елда М. Г. Латыйпов «ТАССРның атказанган сәнгать эшлеклесе» дигән мактаулы исемгә лаек булды. Казандагы Вахитов районының бер урамы Мәсгуть Гали улы Латыйпов исемен йөртә.

Татарстан Республикасы Милли китапханәсенең сәнгать бүлегендә әлеге атаклы шәхес иҗатына багышланган күргәзмә куелды.
Без сезне Казан шәһәренең Театр урамындагы 5 нче йортта урнашкан сәнгать бүлегендә көтеп калабыз.