Габдулла Тукайның туган көненә махсус программа
Якшәмбе, 26 апрельдә, бөек татар шагыйре Габдулла Тукайның тууына 140 ел тула. Бу уңайдан ТР Милли китапханәсе олылар һәм балалар өчен төрле форматтагы чаралар әзерләде. Аларның барысы да күренекле әдипнең тормышына һәм иҗатына багышлана.
Тукайның туган көнендә универсаль залда «Алтын әтәчнең сәяхәтләре» күргәзмәсе ачылачак. Экспозиция төрле мәдәниятләр һәм чорлар аша узучы бер үк сюжет юлын күрсәтә. Китапханә фондларыннан төрле елларда бер үк сюжеттан илһам алган Александр Пушкин, Вашингтон Ирвинг һәм Габдулла Тукай китапларыннан сирәк тышлыклар һәм иллюстрацияләр тәкъдим ителә..
Күргәзмәнең үзәгендә — 1909 елда И. Н. Харитонов лито-типографиясендә басылган, автор исән вакытта чыккан сирәк китаплар - «Алтын әтәч» басмасы. Ул модерн элементлар белән төсле литография техникасында башкарылган матур иллюстрацияләр белән бизәлгән.
Программа:
- 11:00 «Диа-Позитив» лабораториясе | «Су анасы»
- 12:00 «Диа-Позитив» лабораториясе | «Шүрәле» Габдулла Тукайның «Су анасы» һәм «Шүрәле» әкиятләре буенча диафильмнар караячакбыз. Геройларны тавышландырып, персонажларның холкын тикшерербез, рольләргә бүленеп уку атмосферасына чумарбыз. 13:00 «Татарча мемо» өстәл уены Татар мәдәниятен популярлаштыручы Лилия Мингатина татар телендә «Мемо» форматында уен үткәрә. Тема: «Татарстан Республикасы территориясендә яшәүче хайваннар һәм кошлар».
- 14:00 / 15:00 «Казан буйлап Тукай белән» өстәл уены ТР Милли китапханәсе командасы әзерләгән яңа проект — гаилә белән уйнала торган мавыктыргыч сәяхәт. Казан картасы тылсымлы уен кырына әверелә: һәр адым — бөек шагыйрдән бер сорау. Уенда катнашу өчен Тукай әкиятләрен искә төшерергә туры киләчәк. Иң күп белгән кеше җиңәчәк!
- 15:00 Лекторий | «Габдулла Тукай замандашлары күзлегеннән»
Филология фәннәре кандидаты, доцент Миләүшә Хәбетдинова Тукайның XX гасыр башындагы әдәби мохиттәге урыны, замандашлары фикере һәм аның карашларына йогынты ясаган вакыйгалар турында сөйләячәк.