Композитор Заһидулла Яруллинның тууына 125 ел

Татарстан Республикасы Милли китапханәсенең сәнгать бүлеге (Казан, Театр ур., 5 нче йорт) киң җәмәгатьчелек игътибарына, композитор һәм пианист Заһидулла Яруллинның тууына 125 ел тулуга багышлап, аның тормышы һәм иҗат юлы турында күргәзмә тәкъдим итә. Әлеге истәлекле дата 2013 нче елның 12 нче октябрендә билгеләп үтелә.

Заһидулла Ярулла улы Яруллин – «Тукай маршы»ның, «Җәмилә» җырының һәм башка күренекле әсәрләрнең авторы. Пианист һәм халык уен коралларында уйнаучы буларак, ул бик күп эстрада концертларында катнашкан. Заһидулла Яруллин күренекле татар композиторы Салих Сәйдәшевнең беренче музыка укытучысы булган.

Күргәзмәдә З.Яруллинның тормыш һәм иҗат юлындагы күп кенә кызыклы фактлар белән таныштыручы материаллар урнаштырылган. Шулай ук композиторның күңелегезгә ошаган әсәрләрен тыңлау мөмкинлеге дә бар.

Сәнгать бүлегенә рәхим итегез! Без Сезнең белән очрашуга шат булачакбыз!