Казанлыларны урам сәнгатен үстерү турындагы лекциягә чакырабыз
Стрит-арт һәм граффитига үз карашы белән график дизайнер, иллюстратор, нәшрият эше буенча белгеч, DH мәктәбе укытучысы Людмила Крючкова уртаклашачак.
Граффити белән стрит-артны нәрсә берләштерә, сәнгатьнең бу юнәлешләре арасында аерма бармы? 17 гыйнвар - җомга көнне18.30-20.30 сәгатьләрдә ТР Милли китапханәсендә узачак «Урам сәнгате (шәһәр лабиринтлары юлламалары)» лекциясендә сүз шул хакта барачак.
Людмила Крючкова дөньяның төрле почмакларыннан стрит-артның иң яхшы үрнәкләрен тәкъдим итәчәк. Иллюстрация һәм фотография өлкәсендә экспериментатор Александр Родченкодан башлап, «Артмоссфера» биенналесы һәм Санкт-Петербургтагы Стрит-арт музее кебек заманча проектлар белән тәмамлап, илебездә урам сәнгатен үстерү турында сөйләячәк. Лекциядә катнашучылар граффити һәм стрит-арт дөньясына чумачаклар, аларның аерымлыклары һәм охшашлыклары турында субкультура призмасы аша беләчәкләр һәм стрит-артның шәһәрләрнең визуаль образын формалаштыруда нинди роль уйнавы, ни өчен аны вандализмнан аерырга кирәклеге турында үз күзаллауларын формалаштырачаклар.
Лекция заманча сәнгать һәм мәдәният белән кызыксынучы һәркем өчен кызыклы булачак.
Адресы: Казан шәһәре, Пушкин ур., 86 йорт.