«Сөембикә» журналы бездә кунакта

2013 нче елның 12 нче ноябре көнне Татарстан Республикасы Милли китапханәсенең вакытлы матбугат бүлегендә (Казан, К.Маркс ур., 36 нчы йорт), иҗтимагый-сәяси, әдәби-нәфис «Сөембикә» журналына 100 ел тулу уңае белән, редакция журналистлары республиканың муниципаль китапханәләре хезмәткәрләре, Татарстанның төрле районнарыннан һәм Казан шәһәре мәктәпләреннән килгән татар теле һәм әдәбияты укытучылары белән очрашты.

Татар хатын-кызларының милли матбугатына нигез салучы «Сөембикә» журналы 1913 елда нәшер ителә башлый. Ләкин ул 1918 елда ябыла. 1926 елның августында совет чоры хатын-кызлары вакытлы матбугатының беренче карлыгачы булган «Азат хатын» журналының беренче саны дөнья күрә. Тиз арада татар дөньясында популярлык казанып, ул озак еллар буе даими рәвештә, зур тиражлар белән чыгып килә. 1991 елда журнал үз яшәешенең яңа чорына аяк баса, «Сөембикә» дип атала башлый.

«Сөембикә» үзенең сәхифәләрендә, хатын-кызлар мәсьәләләре белән бәйләп, татар милләтенең гомуми проблемаларын нигезле итеп яктырта белә. Журналда татар милли гаиләсен торгызуга, гореф-гадәтләребезне, туган телебезне, милли йолаларыбызны саклауга, халыклар дуслыгын ныгытуга багышланган язмалар даими урын ала.

Редакция хезмәткәрләре журналның үткәне, бүгенгесе, киләчәге турында сөйләделәр, укучыларның күп санлы сорауларына җавап бирделәр.

Китапханәнең вакытлы матбугат бүлеге хезмәткәрләре журналның тарихы белән җентекләбрәк таныштырдылар, үз фондларында сакланучы басмалардан әзерләнгән күргәзмәгә күзәтү ясадылар. Журналның төрле елларда китапханә хезмәткәрләре турындагы язмалар басылган саннары очрашуда катнашучыларда бигрәк тә зур кызыксыну уятты.