Балалар язучысы Т. Крюкова белән очрашу

2013 нче елның 29 нчы ноябрендә Татарстан Республикасы Милли китапханәсенең күргәзмәләр һәм мәдәни программалар бүлегендә (Казан, Кремль ур., 33 нче йорт) балалар язучысы Тамара Шамил кызы Крюкова белән очрашу булды.
Тамара Шамил кызы Крюкова балалар һәм яшүсмерләр өчен төрле жанрларда язучы автор. Аның хәзинәсендә мәктәпкәчә яшьтәге балалар һәм мәктәп укучылары, олылар өчен китаплар тупланган, хыялый, реалистик повестьлар, әкият-повестьлар, хикәяләр, шигырьләр бар. Крюкованың китапларын немец, поляк, словак, чех, венгр, болгар, украин, литва, әзербәйҗан,әрмән, кыргыз телләрендә укыйлар. Язучының әсәрләре 1996 нчы елдан басыла башлап, үзе 1997 нче елда Россия Язучылар берлеге әгъзасы була. 2004 нче елдан үзенең иҗаты өчен һәр елны диярлек бүләкләр ала: 2004 нче елда «Счастливые дети» Халыкара театр фестивале лауреаты, 2005 нче елда Халыкара «Русская культура» фондының беренче премиясе лауреаты, 2007 нче елда IV нче Бөтенроссия «Алые паруса» конкурсының лауреаты була. 2008 нче елда Тамара Шамил кызына мәгариф өлкәсендә «Русский язык» дәреслекләре тупланмасын эшләгән өчен Россия Федерациясе Хөкүмәтенең мәгариф өлкәсендәге премиясе тапшырыла.
Очрашуга яшь буында китап укуга кызыксыну уяту белән янган шәһәр китапханәчеләре килде. Фикер алышу барышында балаларга китап укыту, сыйфатлы балалар әдәбияты чыгару, гаиләдә уку традициясен яңарту мәсьәләләре дә кузгатылды.

.