Италия һәм Берләшкән Гарәп Әмирлекләреннән блогерлар — ТР Милли китапханәсендә экскурсиядә

2026 елның 13 мае, чәршәмбе

13 майда ТР Милли китапханәсендә Татарстан Республикасының социаль һәм мәдәни объектлары белән танышу буенча халыкара блог-турда катнашучылар булды.

Италиядән Майк Понте — сәяхәт һәм туризм турында блог авторы (145 меңнән артык язылучысы бар), Берләшкән Гарәп Әмирлекләре вәкиле Мөхәммәд Әл Мәҗид — цифрлы фильмнар һәм танып-белү контенты авторы (100 меңнән артык язылучысы бар).

Кунаклар Казанда беренче тапкыр гына. Алар Татарстан башкаласына XVII «Россия — Ислам дөньясы: KazanForum» халыкара икътисади форумы чараларында катнашу өчен килгән.

Чит ил блогерлары ТР Милли китапханәсе тарихы белән танышты, беренче кат холлындагы яктылык-хәреф инсталляциясе янында селфи ясады, Казан күренешләре ачылган уку залларының җылы мохитен тойды, шулай ук ТР Милли китапханәсенең иң әһәмиятле урыннарының берсе — газ белән янгын сүндерү системасы урнаштырылган заманча китап саклагычларда булды.

Кунакларда ТР Милли китапханәсенең сирәк фондында сакланучы гарәп графикасындагы китаплар һәм кулъязмалар аеруча зур кызыксыну уятты.