Патент ияләренең хокукларын яклау турында

2014 нче елның 9 нчы гыйнварыннан башлап Татарстан Республикасы Милли китапханәсенең патентлар бүлегендә (Казан, К.Маркс ур., 36) «Патент ияләренең хокукларын яклау» дип аталган күргәзмә эшли.

Уйлап табучыларның һәм патент ияләренең хокуклары яклану һәм гарантияләнү – патент законнарының нәтиҗәлелеген раслаучы дәлил.
Күргәзмәгә куелган әдәбият, гамәлдәге законнарга, халыкара килешүләргә һәм суд практикасына бәйле рәвештә, авторлык хокукларының төп нигезләмәләренә аңлатмалар тәкъдим итә, авторлык килешүләренең үрнәкләрен күрсәтә, гамәли эшчәнлектә аеруча еш барлыкка килә торган сорауларга җаваплар бирә, патент белеменең мөһим төшенчәләре һәм гомуми методикасы, авторлык хокукларын яклау тәртипләре белән таныштыра. Биредәге материалларда уйлап табуларга, кертелгән яңалыкларга карата нәтиҗәле һәм ышанычлы патент яклавы булдыру турындагы төгәл тәкъдимнәр дә бар.

Күргәзмә патент белгечләре, уйлап табучылар, экспертлар, студентлар һәм аларның укытучылары өчен файдалы булачак.