Ринат Таҗетдинов белән очрашу кичәсе

20 нче гыйнвар көнне Татарстан Республикасы Милли китапханәсенең Зур уку залында (Казан, Кремль ур., 33) «Театр кунакханәсе»нең чираттагы мәҗлесе – Г.Камал исемендәге Татар дәүләт академия театры актёры, Россиянең һәм Татарстанның халык артисты, Г.Тукай исемендәге дәүләт премиясе лауреаты Ринат Таҗетдинов белән очрашу кичәсе булды.

Әлеге кичә Милли китапханәнең Камал театры белән берлектә башлап җибәргән уртак проекты кысаларында үткәрелде. Билгеле булганча, беренче очрашу узган елның ноябрь аенда театр артисты Әзһәр Шакиров белән булган иде, ул очрашуда күренекле актёр киң җәмәгатьчелеккә үзенең «Язмыш» китабын тәкъдим итте.
Ринат Таҗетдинов белән очрашуга сәнгать сөючеләр, китап укырга яратучылар, хезмәттәшләре һәм артистның иҗатына гашыйк тамашачылар килде. Сәнгатькяргә җылы рәхмәт сүзләре белән кичәне Татарстан Дәүләт Советының мәдәният, фән, мәгариф һәм милли мәсьәләләр комитеты рәисе, ТР Милли китапханәсенең Химаячеләр шурасы рәисе Разил Вәлиев ачып җибәрде һәм аңарга, күптән түгел узган туган көне белән котлап, китап бүләк итте.
Ринат Таҗетдинов үзенең иҗат биографиясе турында турында сөйләде. Аның чыгышы «Кара чикмән», «Мещаннар», «Бабайлар чуагы» спектакльләреннән өзекләрне экранда күрсәтү белән аралашып барды.

Гомеренең ярты гасыр вакытын Г.Камал исемендәге театр сәхнәсенә багышлап, бүген дә шунда иҗатын дәвам итүче күренекле шәхеснең язмышын шактый тулы тасвирланган «Ринат Таҗетдинов» китабының авторы һәм төзүчесе Юныс Сафиуллин әлеге басма өчен материаллар туплаганда туган матур тәэсирләре белән бүлеште, кызыклы мизгелләрне телгә алды.

«Театр кунакханәсе» түрендәге күренекле затка карата изге теләкләрен Камал театры артисты Наил Дунаев, Татарстан Фәннәр академиясе Г.Ибраһимов исемендәге Тел, әдәбият һәм сәнгать институтының җәмәгатьчелек белән элемтәләр буенча директор урынбасары Нурмөхәммәт Хисамов, рәссам-хаттат Нәҗип Нәкъкаш, театр тамашачылары җиткерде.

Кичәне Камал театры артистларының нәфис сүзле һәм музыкаль чыгышлары бизәде. Раил Шәмсуаровның җырлавы, театр оркестры музыканты Динә Закированың скрипкада уйнавы, Фәнис Җиһаншаның Муса Җәлил шигырьләрен укуы залда утыручылар күңеленә бик хуш килде.
Актёр үзенең «Ринат Таҗетдинов: Истәлекләр, уйланулар, әңгәмәләр» китабына имзасын куеп, теләкләрен язып бүләк итте. Татарстан Милли китапханәсе фондларында китапның берничә нөсхәсе саклана, теләгән һәркем аның белән таныша ала.
Традиция буларак, катнашучылар ахырда күмәк фоторәсемгә төштеләр.

«Театр кунакханәсе»нең чираттагы очрашуы агымдагы елның февраль аенда узачак. Аның көне-сәгате, кем белән булачагы турындагы хәбәрләрне китапханә сайтыннан (http://kitaphane.tatarstan.ru) һәм театр сайтыннан (http://kamalteatr.ru), башка массакүләм мәгълүмат чараларыннан, «Сәнгать яшәешне чагылдыра» төркеме сәхифәсеннән (http://vk.com/public60789652) күзәтеп барыгыз!